Михайло Поливка
| Михайло Поливка | |
|---|---|
 | |
| Чинность | Педагог, автор учебникох |
| Горожанство | Кральовство Югославия, Австро-Угорьско |
| Уроджѣня | марца 10., 1868 |
| Бережничка, жупа Земплин, Мадярске кральовство | |
| Упокоеня | марца 12., 1944 (76 р.) |
| Руски Керестур, Вайдашаг, Мадярске кральовство | |
| Похованя | Руски Керестур, Керестур |
| Праца | Руске народне просвѣтне дружство |
| Брат, сестра | Іван Поливка |
 Михайло Поливка на Вікіскладѣ
| |
Михайло Поливка (*10. марец 1868, Бережничка, жупа Земплин, Мадярске кральовство — †12. марец, 1944, Руски Керестур, Вайдашаг, Мадярске кральовство) — педагог и школный администратор серед Русинох Войводины, автор учебникох, дѣточый писатель, публициста.
Биография
[едітовати | едітовати жрідло]Михайло Поливка родив ся в учительской фамилии. Дѣтство прожив в Буковци.[1] Як и его старшый брат, Иван, выбрав собѣ ити слѣдами отця. Абсолвовав Ужгородску грекокатолицку гимназию (1882-1890).[2] Учительовав у Великом Липнику и Дреници.[1]
В року 1892 за надмѣрно активну народовецку роботу[1] перенесеный до Банату, де учительовав до року 1901 в селѣ Скеюш,[2] де жили Русины, што ся переселили на долны землѣ. Од року 1901 — в Руском Керестурѣ, де быв управительом Державной школы до року 1918.[3] Позднѣше, пензионованый з державной службы, быв директором торговелной школы (1925-1931).[2]
Умер и погребеный в Руском Керестурѣ. Михайла Поливку спoминaють в русинскых селах Войводины межи тыма, што «з русинскым нaрoдoм oстaли вѣчнo».[4][1]
Педагогична и народовецка робота
[едітовати | едітовати жрідло]В Руском Керестурѣ до року 1918 Михайло Поливка быв управительом Державной школы. Школа была зряджена намѣсто бывшой конфесийной школы, на церковном поземку, а понеже мала статус державной, выуковый язык быв мадярскый, а русинскый язык ся занедзбовав,[3][4] и тот стан требало змѣнити. 2. юла 1919 было основане Руске народне просвѣтне дружство (РНПД), котре мало еднов из главных задач выпуск русинскых учебникох. Михайло Поливка активно взяв ся за тоту задачу. В року 1920 вышла его Читанка за III. и IV. класу южно-руских основних школох,[1] доповнене выданя вышло в року 1924.[2] Въедно з предсѣдательом РНПД о. Михайлом Мудри в року 1921 выпустили Буквар за южно-руски основни школи,[1] котрый мав еще перевыданя в роках 1925 и 1929.[2]
Поливка написав еще даколько дѣточых повѣдань, новинковых статей на педагогичны темы и курту историю школы Руского Керестура (1933-1934). Тексты Поливкы были написаны бесѣдным языком войводинскых Руснакох, традичнов карпаторусков орфографиев.[2]
За многорочну плодну педагогичну роботу краль Югославии вызнаменав го титулом и медальов Прикладный учитель Югославии.[1]
Жерела и одказы
[едітовати | едітовати жрідло]- Алмашій, Михайло. Русинська педагогічна енциклопедія. Ужгород, 2005. ISBN 966-2674-43-X. С. 209.
- Магочій П.Р., Поп І. (уклад.) Енциклопедія історії та культури карпатських русинів. Вид-во В.Падяка. Ужгород, 2010. ISBN 978-966-387-044-1. С. 600.
- Руска школа и чуванє руского националного идентитета.
- Рамач, Янко. Школа у Руским Керестуре.