Luciu Anneu Sèneca

Sèneca (Museu archiulòggicu di Nàpuli)

Luciu Anneu Sèneca ('n latinu Lucius Annaeus Seneca), megghiu canusciutu comu Sèneca, fu nu filòsufu rumanu di lu stuicìsimu, ca nascìu nti lu 4 a.C. a Còrdoba (Spagna), nti l'èbbica di lu Mpiru Rumanu di Uttavianu Augustu, e murìu a Roma nti lu 65 d.C. tràmiti suicìdiu ppi svinamentu, sutta anvitu di lu mpiraturi Nironi, sò discìpulu, ca lu cunzidirava parti di la Cungiura di li Pisoni contru di iddu.

Vinni esiliatu di Clàudiu ppi setti anni 'n Còrsica picchì cunzidiratu ntricatu nti nu scànnalu ccu Giulia Livilla, soru di lu mpiraturi Calìgula. Vinni appui pirò chiamatu arreri a Roma di Agrippina minuri, matri di lu mpiraturi Nironi, ppi fari di maistru e cunzigghieri a sò figghiu.