Giacomo Casanova

Giacomo Casanova

Biografia
Nasimènto	(it) Giacomo Girolamo Casanova 2 de apriłe del 1725 Venèsia (Repùblega de Venèsia)
Mòrte	4 de zugno del 1798 (73 ani) Duchcov (Sacro Roman Inpero)
Liogo de sepełimento	Duchcov
Dati personałi
Rełijon	Ceza catòłega
Formasion	Università de Pàdova - In utroque iure (–1742)
Atività
Canpo de laoro	Scrittura creativa e professionale (it) e diplomasia
Laóro	tradutor, diplomàtego, scritor, aventuriero, romanxiero, bibliotecàrio, banchiero, poeta, autobiògrafo
Instrumento muxegałe	Viołin
Òpara
Òpare in rezalto (1788) Storia della mia fuga dai Piombi (it) (1790-1798) Storia della mia vita (it)
Fameja
Fiołi	Leonilda Castelli (en) , Cesarino Lanti (en)
Zenitori	Gaetano Casanova   e Zanetta Farussi
Fradełi	Francesco Casanova (it) , Giovanni Battista Casanova (it) , Faustina, Maria e Gaetano
Ordine dello Speron d'oro (it)

Giacomo Girolamo Casanova (Venesia, 2 de apriłe 1725 – Dux, odierna Duchcov, 4 de zugno 1798) xe stà un [[scritor |scritor]], [[diplomatico |diplomatico]] e [[aventuriero |aventuriero]] [[Republica de Venesia |venesian]].

Resta de lu na produsion łeteraria tanto vasta ma el vien prinsipalmente ricordà come aventuriero e come cuel che ga fato del so nome el sinonimo de sedutor. A sta fama ga contribuìo verosimilmente ła so pì inportante opera autobiografica: Histoire de ma vie (Storia de ła me vita), dove l’autor el descrive, co ła masima franchesa, tute łe so aventure, i so viaji e i so incontri co łe done.

L'Histoire ła xe sta scrita in fransexe e ła dovarìa duncue far parte de ła leteratura in sta łéngua, siben ła sielta lengoistega ła sia sta detà soło par motivi de difuxion de l'opera, in cuanto a l'epoca el fransexe la zera ła łéngua pì conosesta e parlà in Eoropa, come ai tenpi nostri l'inglexe. Casanova steso, inte ła prefasion de ł'Histoire, el ga scrito infati, faxendo riferimento a ła major difuxion de ła łéngua fransexe

Sicuro de l'imortałità de ła so opera, o al fin de garantirseła, Casanova el ga scrito perciò doparando ła łéngua che ła ghe gavaria consentio de ciapare el major numaro posìbiłe de potensiałi letori. Tante opare minori, del resto, łe ga scrite in itałian, forse parché el saveva ben che non łe saria mai divegnue on monumento, come invese a xe sta par ła so autobiografia.

A xe da notare, in sto caxo, łe anałogie coł so amigo Carlo Goldoni, el cuałe el ga sielto inte el steso modo de scrivare ła propria autobiografia in fransexe.

Ł'autobiografia de Casanova, a parte el vałore leterario, ła xe on inportante documento par ła storia del costume, forse una de łe opare leterarie pì inportanti par conosare ła vita cuotidiana in Eoropa inte el '700. A se trata de na rapresentasion che, par łe frecuentasion de l'autor e par ła łimitasion dei posìbiłi łetori, ła riferise prinsipalmente de łe clasi dominanti de l'epoca, nobiltà e borghesia, ma cuesto no el ne łimita l'intarese parché anca i personji de contorno, de cualsiasi estrasion, i xe ben rapresentà. Łèxare st'opara el xe on strumento inportantisimo par conosare el cuotidiano dei uomani e de łe done de ałora, par conprendare dal de drento ła vita de ogni dì.

Fra corti e sałoti, Casanova el ga sfiorà - sensa cuasi gnanca incorzersene - on momento de svolta epocałe de ła storia. El ga incontrà pareci intrà i grandi del so tenpo e el ne ga documentà i incontri; i zera intrà cuesti personaji come Rouseau, Voltaire, ła Pompadour, Mozart, Caterina II de Rusia, Federico II de Prusia. Ma Casanova no el ga capìo el spirito de rinovamento che el gavarìa fato xołare la storia verso diresion mai percorse prima. El xe restà łigà fino a ła fin al vecio regime e a cueła clase da ła cuałe, par nasita, el zera sta escluxo e de ła cuałe el ga sercà disperatamente de far parte, anche cuando ormai ła zera irrimediabilmente destinà al tramonto.

Biografia

Da ła nasita a cuando che el xe scapà dai Pionbi (1725 - 1756)

Giacomo Casanova el xe nato a Venesia in Całe della Comedia (adeso Całe Małipiero), viçin a ła cexa de San Samuele dove el xe sta batezà. So pare zera Gaetano Casanova e ła mare Zanetta Farusi, ma ła voxe popołare ło considerava fruto de na rełasion extraconiugałe de ła mare col nobiłe Michele Grimani. I genitori i zera atori e soratuto ła mare pare ła gabìa avù suceso inte ła so profesion esendo sta cità, co cualche riłievo, da Carlo Goldoni inte łe so Memorie, dove ła ga definìa: "....una vedova bellisima e asai valente".

Restà orfano de pare a sołi oto ani e esendo ła mare senpre in viajo a causa de ła so profesion, el xe sta ałevà da ła nona Marzia Farusi. Giacomo el zera da picinin de cativa sałute. Par sta raxòn, so nona ło fa portà da na stria che ła xe riusìa guarirlo dai disturbi faxendo on rito. Dopo che l'esperiensa infantiłe, l'intarese par łe pràteghe magiche ło ga conpagnà par tuta ła vita ma lu steso el zera el primo a ridare de ła credułità che tanti i manifestava inte i confronti de l'exoterismo. El ga studià a l'università de Padova dove el se ga laureà in dirito inte el 1742. Sucesivamente el ga viajà a Corfù e Costantinopołi. Ntel 1743 el xe rientrà a Venesia giusto par vèdare ła morte de so nona Marzia. Co ła morte de so nona, a cui el ghe vołeva on gran ben, a se ga sarà on periodo inportante de ła so vita: so mare ła ga decixo de łasàre ła beła e cara (de preso) caxa in Całe de ła Commedia e de sistemar i fiołi in modo economicamente pì sostenibiłe. Sto avegnimento el ga segnà profondamente Giacomo, tiràndoghe via on inportante punto de riferimento. Inte ło steso ano el xe sarà, a cauxa de ła so condota pitosto turbołenta, inte el Forte de Sant'Andrea da ła fin de marso a ła fin de lujo. Pì che l'aplicasion de na pena, el xe sta on avertimento tendente a sercar de corezare el so caratare.

Meso in libertà, el xe partio, grasie ai boni ufici materni, al seguito del vescovo de Martirano (Całabria) che el zera drio 'ndare a asumare ła diocexi. Na volta rivà a destinasion el ga ciapà paura par łe condision de aretratesa del łogo, el ga domandà e otegnù el congedo. El ga viajà a Napułi e a Roma, dove inte el 1744 el ga ciapà servisio dal cardinal Accuaviva, anbasiador de ła Spagna preso ła Santa Sede. Ł'esperiensa ła xe finìa presto a cauxa de ła so condota inprudente: infati el gaveva ospità inte el Palaso de Spagna, rexidensa ofixial del cardinałe, na putea scapà de caxa.

cuando el xe tornà a Venesia par on serto periodo el se ga guadagnà da vivare sonando el viołin inte el teatro de San Samuełe, de proprietà dei nobiłi Grimani che, a ła morte del pare, avegnua prematuramente (1733), i gaveva asunto ofixialmente ła tuteła del toso, avałorando ła voxe popołare secondo ła cuałe uno dei Grimani, Michele, el fuse el vero pare de Giacomo.

Inte el 1746 a ghe xe sta l'incontro col patoreo venesian Matteo Bragadin, che el gavaria mijiorà sostansialmente łe so condision. Colpio da on małore, el nobiłomo el xe sta socorso da Casanova e tanto da convinzarse che, grasie a cuel tenpestivo intervento, el gaveva podesto salvarse ła vita. De conseguensa el ga scuminsià a considerarlo cuaxi come el fioło che no'l gheva mai vù, contribuendo, finché el ga vivesto, al so mantenimento. Ma ła frecuentasion co i nobiłi el ga atirà su de łu l'intarese dei Incuixitori de Stato e Casanova, su consejo de Bragadin, el ga łasà Venesia aspentando tenpi mejo.

Inte el 1749 el ga incontrà Henriette, che ła sarìa sta forse el so pì grande amore. Ło pseudonimo el scondeva probabilmente l'identità de na nobildona de Aix in Provence, forse Adelaide de Gueidan . So cuesta e so altre identificasion, i "caxanovisti" i se xe tirà par i cavej par tanti ani. In łinea de masima, come a xe sta sostegnù da pareci studioxi, i personaj cità inte łe Memorie i xe reałi. Al più, l'autore el podaria esarse cautełà co cualche picoła acortesa: speso, tratandose de done maridà, alcune łe xe cità co łe inisiałi o co nomi de fantaxia, talvolta l'età ła vien on fià modifegà par gałanteria o par vanità de l'autore che no el ghe piaxeva cuntare de aventure co done considerà, co i criteri de ałora, in età matura, ma in generałe łe persone łe xe identificabiłi e anca i fati riferìi i xe risultà coreti e riscontrabiłi. Parece identificasion e notisie documentałi łe ga confermà el raconto.

Frontespisio de ła so autobiografia

Se cualche erore a ghe xe sta, el xe dovù al anche al fato che, a l'epoca inte ła cuała a xe sta scrite łe Memorie (dal 1789 in po'), a zera pasà tanti ani dai fati e, par cuanto l'autore el xe posa esare ajutà co diari o apunti, a no zera afato façiłe metare a posto cronołogicamente i avegnimenti. Ogni tanto l'autore el se faxeva parò trasinare da ła so vixion teatrałe de łe robe no el rinunciava apunto a cualche "colpo de teatro". El ché, peraltro, el contribuise a rendare ła łetura pì piaxevołe.

El problema de l'atendibiłità del raconto caxanovian el xe tutavia parecio conpleso: ciò ca xe veramente difiçiłe o, in tanti caxi, adiritura inposìbiłe da vałutare a xe se i raporti che Casanova riferise de aver intratenù co i personaji i sia rispondenti a ła realtà dei fati. Tałuni studioxi i ga ritegnu che inte el corpus de łe Memorie a sia sta inserìi dei pasaji totalmente romanzà e de pura invension, basà comuncue su personaji storegamente esistìi e efetivamente presenti inte el łogo e inte el tenpo de ła descrision.

El caso pì eclatante el xe cueło che riguarda ła rełasion de Casanova co suor M.M. e i conseguenti raporti co l'anbasiador de Fransa De Bernis. A se trata de una de łe parti pì vałide de l'opera dal punto de vista łeterario e stiłistego. El ritmo del raconto el xe seratisimo e ła tension emotiva dei personaji de straordinario reałismo. Secondo alcuni studioxi el raconto el xe asołutamente veritiero e el se ga ripetutamente tentà l'identificasion de ła donna, secondo altri el raconto el xe de pura fantaxia e baxà so łe confidense del cuogo de l'anbasador (tałe Rosier) che efetivamente Casanova el conoseva parecio bene. Ła diatriba tra łe varie texi łe continuarà ma, comuncue łe sia łe robe, el vałore de l'opara non canbia parché ciò che perde el Casanova memoriałista ło guadagna el Casanova romanziere.

Inte el zugno del 1750, a Lione, Casanova el ga aderìo a ła Masoneria. Non pare che ła decixion ła fuse ascrivìbiłe a inclinasion ideołogiche, ma pitosto al pragmatego dexiderio de procurarse utiłi ajuti. El ga ragiunto cualche risultato, infati pareci personagi incontrà inte el corso de ła so vita, come Mozart e Franklin i zera sertamente masoni e alcune façiłitasion avù in varie ocaxion a pararìa dovùe ai benefici derivanti dal far parte de on'organisasion ben radicà in cuaxi tuti i paexi eoropei. Inte ło steso periodo el xe 'ndà a Parigi dove el ga inparà el fransexe, che el sarìa diventà ła so łéngua łeteraria oltre che, in pareci caxi, epistołare.

Ritornà a Venesia dopo el łongo sogiorno parixin e altri viaji a Dresda, Praga e Viena, inte ła note tra el 25 e el 26 de lujo 1755, el xe sta arestà e portà inte i Pionbi. Come d'uxo a l'epoca, al condanà a non vegneva notificà el cao d'acuxa, né ła durata de ła detension cui el zera sta condanà. Ciò, come in seguito el ga scrito, el se ga rivełà danoxo, poiché se el gavese savesto che ła pena ła zera de durata tuto somà soportabiłe, el se sarìa ben vardà da l'afrontare el ris'cio mortałe de l'evaxion e soratuto el pericoło de ła posìbiłe sucesiva ełiminasion da parte dei incuixitori i cuałi, speso, i arivava a operare anca parecio distante dai confini deł Republica. Sti magistrati i zera l'espresion pì evidente de l'arbitrarietà del poter ołigarchego che governava Venesia. I zera insieme tribunałe speciałe e sentrałe de spionajo.

Sui reałi motivi de l'aresto a se xe ciacołà parecio. A xe parò zerto ze el conportamento de Casanova el zera tegnuo d'ocio dai incuisidori e a resta parece riferte (raporti deł spie pagà dai Incuisidori) che i ne descriveva minutamente i conportamenti, soratuto cuełi considerai socialmente sconvenienti. In definitiva l'acusa ła zera cueła de "libertinagio" fato co done maridà, de spregio de ła rełijon, de circonvension de alcuni patore e in generałe de un conportamento pericołoxo par el bon nome e ła stabiłità del regime aristocratego. De fato, Casanova el conduxeva na vita alcuanto disordinata ma né pì né manco de tanti ranpoł de łe caxate iłustri: come cuesti el xugava, el barava e el gaveva anca de łe idee abastansa personałi in materia de rełijon e, cuel che xe pezo, non el ghe ne faxeva mistero.

Anche ła so adexion a ła Masoneria, che ła zera nota ai Incuisidori, non ła ghe giovava, cusì come ła scandałoxa rełasion intratenua co "suor M.M.", sertamente apartegnente al patoreato, munega inte el convento de S. Maria dei Angeli in Muran, e amante de l'anbasadore de Francia abate De Bernis. Insuma, l'ołigarchia al potere non ła podeva tołerare oltre che on individuo ritegnuo socialmente pericołoxo el restase in circołasion.

Tutavia i apoxi, de cui sertamente podeva dispore inte l'anbito del patoreato, i ło ga ajutà notevolmente par otegnere na condana "łeziera". Ła contradision ła xe soło aparente, parché Casanova el xe senpre sta on personajo anbivałente: par estrasion e mezi el faxeva parte de na clase subalterna, anche se contigua a ła nobiltà, ma par frecuentasion e protesion el podeva parere far parte, a cualche titoło, de ła clase al potere. A sto riguardo a va anca dito che el so prexunto pare naturałe, Michele Grimani, el apartegneva a una de łe fameje pì iłustri de l'aristocrasia venesiana, anoverando ben tre dogi e altretanti cardinałi. Sta paternità ła xe sta rivendicà da Casanova steso inte el łibeło Né amori né donne e pare che anca ła somejansa de aspeto e de corporatura dei du avałorase parecio ła texi.

Da ła fuga dai Pionbi al ritorno a Venesia (1756 - 1774)

Apena rimesose dal shock de l'aresto, Casanova el ga scominzià a organizare ła fuga. On primo tentativo el zera sta vanificà da on spostamento de ceła ma, inte ła note intrà el 31 de otobre e el primo novenbre 1756, el ga meso in ato el so piano: pasando da ła ceła ai sofiti, atraverso on buxo inte el sofito praticà da on conpagno de recluxion, el frate Marino Balbi, sbuxà fora sol teto e po' el se ga całà de novo a l'interno del pałaso da on abaino. El xe Pasà cuindi, in conpagnia del conplice, traverso varie camare e el xe sta infin notà da on pasante che el pensava che el fuse on vixitator restà sarà drento. cuesti el ga ciamà uno dei adeti al pałaso che el ghe ga verto el porton, consentendo ai du di 'ndar fora e 'ndar via in presia co na gondoła. I se ga direti in presia verso Nord. El problema el zera de semenare i inseguitori, infati ła fuga ła butava on'onbra so l'aministrasion de ła giustisia de Venesia e a zera ciaro che i Incuisidori i gavaria tentà de tuto par ciufare i evaxi. Dopo curti sojorni a Bolzan, Monaco de Baviera, dove Casanova finalmente el se ga libarà de ła scomoda presensa del frate, Augusta e Strasburgo, el 5 de genaro 1757 el xe arrivà a Parigi, dove inte el frattenpo el so amigo De Bernis el zera diventà ministro e cuindi i apoxi i no i ghe mancava.

Rinfrancà e catà na sistemasion, el ga scuminsià a dedicarse a ła so speciałità: briłar in società, frecuentando cuanto de mejo ła cavadal ła podese ofrire. El ga conosesto tra i altri ła marchexa d'Urfé nobildonna siora e stravagante, co ła cuałe el ga intrategnù na longa rełasion, diłapidando pareci schei che eła ła ghe meteva contenta a dispoxision, sojogà dal so fasino e dal consueto coredo de rituałi magichi. Parecio fantaxioxo, el se ga fato promotore de na loteria nasional, inte el scopo de rinsaldare łe finanse del stato. El vedeva che cuesto el zera l'unjoło modo de far contribuire contenti i sitadini a ła finansa publica.

Ł'intuision ła zera talmente vałida che oncora adeso el sistema el xe tanto praticà. Ł'inisiativa ła xe sta autorixà ofixialmente e Casanova el xe sta nominà Ricevitore el 27 de genaro 1758. Inte el setenbre del steso anno, De Bernis el xe sta nominà cardinałe; on mexe dopo Casanova el xe sta incaricà dal governo fransexe de na mision segreta in Olanda. Al so ritorno el xe sta coinvolto inte on'intrigà facenda riguardante na gravidansa indexiderà de on'amiga venesiana, Giustiniana Wynne.

De mare itałiana e pare inglexe, Giustiniana ła zera sta al sentro de l'atension par ła so rovente rełasion co on patoreo venesian, Andrea Memmo. cuesti el gaveva sercato in tuti i modi de spoxarla, ma ła raxon de stato (lu el zera menbro de una de łe dodexe fameje - cusidite apostołiche - pì nobiłi de Venesia) i ghe ło gheva inpedio, a causa de alcuni oscuri trascorsi de ła mare de eła. In seguito ało scandało che ne zera vegnù fora, i Wynne i gaveva lasià Venesia. Rivà a Parigi, trovandose insinta e de conseguensa in grose dificoltà, ła tosa ła se ga rivolto par juto a Casanova che ej zera on otimo amigo del so amante. Ła letara col cuało ła ghe inplorava juto ła xe sta catà e a xe singołare come ła putłea ła se rivolge a Casanova in modo s'ceto, dimostrando na fiducia totałe in st'ultimo, tegnù conto de l'enorme ris'cio a cui ła se esponeva (e ło esponeva) inte el caxo inte el cuało el mesajo el fuse cascà inte łe man sbaglià.

Casanova el se ga prodigà par darghe juto ma eò xe incorso inte na denuncia, par concorso in pràteghe abortive, presentà da on'ostetrica, Reine Demay, in conbuta co on losco personajo, Louis Castel-Bajac, par estorzare schei in canbio de na ritratasion. Ł'acuxa ła zera on mucio grave, comuncue Casanova el xe riusìo a cavarseła co ła consueta presensa de spirito e el xe sta prosiolto, mentre ła so acusatora ła xe finìa in preson. Ła putea ła ga abandonà l'idea de interonpare ła gravidansa e in seguito ła ga partorìo inte on convento dove ła se zera rifugià. Vendù i so intaresi inte ła łoteria, Casanova el se ga inbarcà inte na fałimentare operasion inprenditoriałe (na fabrica de pani) che ła xe naufragà anche a cauxa de na forte restrision de łe esportasion derivante da ła guera in corso. I debiti che ne ghe zera derivà i ło ga condoto par on fià in prexon (agosto 1759). Come al sołito, el providensiałe intervento de on'amiga, ła siora e potente marchexa d'Urfé, ło ga tirà fora da l'incomoda situasion. I ani sucesivi i xe sta on intenso continuo peregrinar par l'Eoropa. El xe 'ndà in Ołanda, po' in Svisera, dove el ga incontrà Voltaire. In seguito in Itałia, a Genoa, Firenze e Roma.

Casanova e łe done

Chi a viveva el fradeo Giovanni, pitore, alievo de Mengs. Durante el sojorno preso el fradeo el xe sta riçevù dal papa Clemente XIII. Inte el 1762 el xe ritornà a Parigi, dove el ga riprexo a exercitare pràteghe exoteriche insieme a ła marchesa d'Urfé, fino a che st'ultima, rexase conto de esare sta par ani ciapà in giro co l'iłuxion de rinasare xovane e beła par meso de pràteghe magiche, ła ga troncà ogni raporto co Casanova che, dopo poco tenpo, el ga lasà Parigi, dove el clima che el se zera creà no el ghe zera pì favorevołe, par Łondra, dove el xe sta presentà a corte.

Inte ła cavedal inglexe el ga conosesto Charpillon, col cuało el ga sercà de intesare na rełasion. Inte sta sircostansa anca el grande sedutor el ga mostrà el so łato debołe e sta scaltra putea ło ga portà fin cuaxi a coparse. No el zera on grande amore, ma evidentemente Casanova no el podeva acetare de esare tratà co indifarensa da na putea cualsiasi. E più lu el se ghe intestardiva, pì eła ło tołeva in giro. Ma a ła fin el xe riusìo a liberarse de sta asurda situasion e el se ga direto verso Berlin.

cui el ga incontrà l'inperador Federico el Grande, che el ghe ga oferto on modesto posto de insegnante inte ła scoła dei cadeti. Rifiutà sdegnosamente ła proposta, Casanova el se ga direto verso ła Rusia. A Mosca inte el diçenbre del 1764 el ga incontrà l'inperatora Caterina II, anca eła anesa a ła straordinaria cołesion de personaji storeghi incontrà inte el corso de łe so peregrinasion sensa fine. A merita na riflesion ła straordinaria fasiłità col cuało Casanova el gaveva aceso a personaji de primisimo niveło, che serto no i zera uxi a incontrarse co chiuncue. Evidentemente ła fama ło precedeva regołarmente e, almanco par efetto de ła curioxità susità, ła ghe consentiva de penetrare inte i sircołi pì esclusivi de łe cavedal.

On fià ła cuestion ła se autoałimentava, inte el senso che in cualsiasi posto el se trovase, Casanova el se dava senpre on gran da fare par otegnere letare de presentasion par ła destinasion sucesiva. Evidentemente el ghe zontava de suo: el gaveva conversasion briłante, na cultura ençiclopedica fora del comun e, cuanto a esperiense de viajo, el ne gaveva acumułà infinite, inte on'epoca dove ła zente non ła viajava on granché. Insuma Casanova el so fasino ło gaveva, e no ło spendeva soło co łe done.

Inte el 1766 in Połonia a ghe xe sta on epixodio che el ga segnà profondamente Casanova: el dueło col conte Branicki. cuesti, durante on łitigio a cauxa de ła bałerina venesiana Anna Binetti, ło gheva apostrofà ciamandoło poltron venesian. El conte el zera on personajo de rilievo a ła corte del re Stanislao II Poniatowski e par o n straniero privo de cualsiasi coverdura połitica a no zera tanto consejàbiłe contrastarlo. cuindi, anca se ofexo pexantemente dal conte, cualsiasi omo de normałe prudensa el se sarìa ritirà co in bon ordene; Casanova, invese, che evidentemente no el zera soło on amàbiłe conversator e on àbiłe sedutor, ma anca on omo de corajo, ła ga sfidà inte on dueło a ła pistoła. Facenda asai pericołosa, sia in caxo de soconbensa che in caxo de vitoria, in cuanto a zera fàsiłe spetarse che i amighi del conte i ne gavaria rapidamente vendicà ła morte.

El conte el ne zera vegnù fora ferìo in modo gravisimo, ma non abastanza da inpedirghe de pregare i so amighi de łasar andare indene l'aversario, che el se zera conportà secondo łe regołe. Sepur ferìo abastanza seriamente a on braso, Casanova el xe riusìo a lasiare ła Połonia. Ła bona steła ła pareva averghe voltà łe spałe. El se ga direto a Viena, da dove el xe sta espulso.

Tornà a Parigi, el xe subito colpìo (novenbre 1767) da na lettre de cachet del re Luigi XV, co ła cuałe a ghe vegneva intimà de łasare el paexe. El provedimento el zera sta domandà dai parenti de ła marchesa d'Urfé, i cuałi i intendeva metare al riparo da ulteriori ris'ci łe pur cospicue sostanse de fameja.

El xe 'ndà cuindi in Spagna, ormai a ła riserca disperada de na cualche ocupasion, ma anca chi no ła xe 'ndà mejo: el xe sta butà in prexon co motivi pretestuoxi e ła facenda ła xe durà pì de on mexe. El ga łasà ła Spagna par andar Provenza dove parò el xe ga małà (genaro 1769).

El xe sta asistìo grasie a l'intervento de Henriette che, inte el fratenpo ła zera restà vedova, ła gaveva conservà de lu on otimo ricordo. El ga riprexo, dopo esarse rimeso da ła małatia, el so peregrinare, 'ndando a Roma, Napułi, Bułogna, Trieste. In sto periodo a se ga infitio i contati co i Incuixidori venesiani par otegnere ła grasia, che finalmente ła ghe xe sta concesa el 3 de setenbre 1774.

Dal ritorno a Venesia a ła morte (1774 - 1798)

Ritornà a Venesia dopo disdot'ani, Casanova el ga ristabiłio łe vece amicisie, paraltro mai sopìe grasie a on'intensisima atività epistołare. Par vivare, el se ga proposto ai Incuisidori come spia, proprio in favor de cuei che i zera sta tanto decixi prima a condanarlo a ła recluxion e po' a costrinzarlo a on longo bando. Łe riferte di Casanova no łe xe mai sta particołarmente intaresanti e ła cołaborasion ła se ga trasinà stracamente fin a interonparse par "scarso rendimento". Probabilmente cualcosa in lu ła se oponeva a esar cauxa de persecusion che, avendołe provà in prima persona, łe conoseva ben.

Restà sensa schei, el se ga dedicà a l'atività de scritor,doparando ła so vasta rede de rełasion par procurare sotoscritori a łe so opare. A l'epoca a se uxava far sotoscrivare on ordinativo de łivri prima oncora de aver dà a łe stanpe o adiritura fionìo l'opara, in modo da esar serti de poder sostenere i alti costi de stanpa. Infati ła conpoxision ła vegneva fata manualmente e łe tiradure łr zera base. Inte el 1775 el ga publicà il primo tomo de ła tradusion de l'Iłiade. Ła łista de sotoscritori, o sia de cuei che gaveva finansià l'opara, ła zera davero notevołe e ła conprendeva oltre doxentotrenta nomi intrà cuełi pì in vista a Venesia, conprexe łe alte autorità del stato, siè Procuratori di S. Marco (ligo ronpesto dispunìbiłe in Internet Archive; védarse el istòrego, la prima version e ła ùltema).

in carica du fiołi del doge Mocenigo, profesori de l'Università de Padoa e cusì via. Serto, par esare on ex carcerato evaxo, po' grazià, el gaveva de łe bełe frecuentasion. El fato de far parte de ła lista no zera tegnuo segreto, ma inte na sità picinina, dove tute łe persone che łr cuntava łe se conoseva, a zera de publico dominio, duncue łe adexion łe dimostra che, malgrado łe so vicisitudini, Casanova no el zera afato on emarxinà. Anca chi a xe oportuna na riflesion so l'anbivałensa del personajo e sol so eterno osciłare tra ła clase rejeta e cueła priviłexà.

Inte sto steso periodo el ga scuminsià na rełasion co Francesca Buschini, na putea tanto senplice e incolta che par ani ła ga scrito a Casanova, dopo el so secondo bando da Venesia, de łe letare (catà a Dux) de on'ingenuità e teneresa cmmoventi, doparando on łesico tanto influensà dala łéngua venesiana, co evidenti tentativi de italianisar el pì posìbiłe el testo. cuesta ła xe sta l'ultima rełasion inportante de Casanova e łu el xe restà parecio 'tacà a ła dona: anca cuando el ne xe sta łontan, ratristà profondamente da ła fin de ła so vita, el tegneva na fita corispondensa co Francesca, oltre a continuare a pagar, par ani, l'afito de ła casa in Barbaria de łe Tołe, in cui i gaveva vivesto insieme, inviandoghe, cuando el ne gaveva ła posibiłità, łetare de canbio co discrete some de denaro.

Inte i ani sucesivi el ga publicà altre opare e el ga sercà de arabatarse come mejo el podeva. Ma el so caratare inpetuoxo el ghe ga xugà on bruto scherso: ofexo platealmente in casa de Grimani da on serto Carletti, col cuałe el gaveva cuestionà par motivi de schei, el se gheva risentìo parché el paron de caxa el gaveva ciapà łe parti del Carletti. El ga decixo a sto punto de vendicarse conponendo on łibeło, Né amori né donne, o sia la stalla ripulita dove, pur soto on łàbiłe travestimento mitołogico, fasilmente svełabiłe, el sostegneva ciaramente de esare lu steso el vero fioło de Michele Grimani, mentre invese Zuan Carlo Grimani el sarìa sta "notoriamente" fruto del tradimento de ła mare (Pisana Giustinian Lolin) co on altro nobiłe venesian, Sebastiano Giustinian.

Ritrato del 1788

Probabilmente a zera tuto vero, anca parché inte na sità dove łe distanse tra łe caxe łe se mixurava a spane, se circołava in gondoła e a ghe zera stuołi de servidori che oviamente i spetegołava a pì non poso, a zera inpensàbiłe poder tegnere segreto alcunché. Comuncue anca in sto caxo l'aristocrasia ła ga fato cuadrato e Casanova el xe sta costreto a l'ultimo definitivo bando. Tutavia ła cuestione no ła xe pasà inoservà sa se zera ritegnù oportuno far sircołare on łibeło anonimo, dove a se replicava inte el scrito caxanovian, intitołà "Contrapposto o sia il riffiutto mentito, e vendicato al libercolo intitolato Ne amori ne donne o sia La stalla ripulita, di Giacomo Casanova".

El ga łasà Venesia inte el genaro 1783 e el se ga direto verso Viena. Par un fià el ga fato da segretario a l'anbasador venesian Sebastiano Foscarini po', a ła morte de cuesti, el ga acetà on posto de bibliotecario inte el casteło del conte de Waldstein a Dux, in Boemia. Lì el ga pasà i ultimi tristisimi ani de ła so vita, tolto in giro da ła servitù, ormai inconprexo, e considerà el rełito de on'epoca tramontà par senpre.

Da Dux, Casanova el ga asistìo a ła Rivolusion fransexe, a ła fin de ła Republica de Venesia, al crołar del so mondo. O almanco de chel mondo a cui el gaveva sognà de far parte stabilmente. Ł'ultimo conforto, oltre a łe tante łetare dei amighi venesiani che i ło tegneva al corente de cuanto acadeva inte ła so sità, a xe sta ła conpoxision de ła Histoire de ma vie, l'opara autobiografica che ła ga asorbìo tute łe so rexidue energie, scrita cuaxi co furore instancàbiłe cuaxi par non farse precedere da na morte che ormai el sentiva che ła stava par 'rivare.

Anotasion de ła morte de Casanova inte i registri de Dux

Scrivendoła, Casanova el riviveva na vita asołutamente iripetibiłe, tanto da diventare on mito, inte l'imaginario cołeivo. 'Nna vita opara d'arte. Sicuramente el se rendeva conto, cuntandoła, de cuanto mondo el gavese visto e de cuante esperiense el fuse sta interprete. El xe morto e 4 de zugno del 1798.

Opere de Giacomo Casanova

• 1752 - Zoroastro, tragedia tradotta dal Francese, da rappresentarsi inte el Regio Elettoral Teatro di Dresda, dalla compagnia de' comici italiani in attuale servizio di Sua Maestà inte el carnevale dell'anno MDCCLII. Dresda.
• 1753 - La Moluccheide, o sia i gemelli rivali. Dresda
• 1769 - Confutazione della Storia del Governo Veneto d'Amelot de la Housaie, Amsterdam (Lugano).
• 1772 - Lana caprina. Epistola di un licantropo. Bologna.
• 1774 - Istoria delle turbolenze della Polonia. Gorizia.
• 1775 - Dell'Iliade di Omero tradotta in ottava rima. Venezia.
• 1779 - Scrutinio del libro "Eloges de M. de Voltaire par différents auteurs". Venezia.
• 1780 - Opuscoli miscellanei - Il duello - Lettere della nobil donna Silvia Belegno alla nobildonzella Laura Gusoni. Venezia.
• 1781 - Le mesager de Thalie. Venezia.
• 1782 - Di aneddoti viniziani militari ed amorosi del secolo decimocuarto sotto i dogadi di Giovanni Gradenigo e di Giovanni Dolfin. Venezia.
• 1782 - Né amori né donne o sia la stalla ripulita. Venezia.
• 1784 - Lettre historico-criticue sur un fait connu, dependant d'une cause peu connu… Anburgo (Desau).
• 1784 - Expositionne raisonée du différent, cui subsiste entre le deux Républicues de Venise, et d'Hollande. Vienna.
• 1785 - Supplément ga l'Exposition raisonnée. Vienna.
• 1785 - Esposizione ragionata della contestazione, che susiste trà le due Repubbliche di Venezia, e di Olanda. Venezia.
• 1785 - Supplemento ala Esposizione ragionata…. Venezia.
• 1785 - Lettre a monsieur Jean et Etienne Luzac…. Vienna.
• 1785 - Lettera ai signori Giovanni e Stefano Luzac…. Venezia.
• 1786 - Solilocue d'un penseur, Prague chez Jean Ferdinande noble de Shonfeld imprimeur et libraire.
• 1787 - Histoire de ma fuite des prisons de la Républicue de Venise cu'on appelle les Plombs. Ecrite a Dux in Boheme l'année 1787, Leipzig chez le noble de Shonfeld.

Frontespisio deł Icosameron

• 1788 - Icosameron ou histoire d'Edouard, et d'Elisabeth cui pasèrent cuatre vingts ans chez les Mégramicres habitante aborigènes du Protocosme dans l'interieur de notre globe, traduite de l'anglois par Jaccues Casanova de Seingalt Vénitien Docteur èn lois Bibliothécaire de Monsieur le Comte de Waldstein seigneur de Dux Chambellan de S.M.I.R.A., Prague ga l'imprimerie de l'école normale. Praga.
• 1790 - Solution du probleme deliacue démontrée par Jaccues Casanova de Seingalt, Bibliothécaire de Monsieur le Comte de Waldstein, segneur de Dux in Boheme e c., Dresde, De l'imprimerie de C.C. Meinhold.
• 1790 - Corollaire a la duplication de l'Hexaedre donée a Dux in Boheme, par Jaccues Casanova de Seingalt, Dresda.
• 1790 - Demonstration geometricue de la duplicaton du cube. Corollaire second, Dresda.
• 1797 - A Leonard Snetlage, Docteur in droit de l'Université de Gottingue, Jaccues Casanova, docteur in droit de l'Universitè de Padoue. Dresda.

Opere publicae dopo la morte de l'autor

• 1886 - Le Polemoscope, a cura di Gustave Kahn. La Vogue Parigi.
• 1960-1961 - Histoire de ma vie, F.A. Brockhaus, Wiesbaden e Plon, Parigi. Edizioni italiane basate sul manoscritto originale: Piero Chiara (a cura di), traduzione Giancarlo Buzzi - Giacomo Casanova, Storia della mia vita, ed. Mondadori 1965. VII voll. di cui uno di note, documenti e apparato critico. Piero Chiara e Federico Roncoroni (a cura di) - Giacomo Casanova, Storia della mia vita, ed. Mondadori "I meridiani" 1983. III voll. Ultima edizione Mondadori "I meridiani" 2001.
• 1985 - Examen des "Etudes de la Nature" et de "Paul et Virginie" de Bernardin de Saint Pierre, a cura di Marco Leeflang e Tom Vitelli. Utrecht, 1985. Edizione italiana: Analisi degli "Studi sulla natura" e di "Paolo e Francesca" di Bernardin de Saint-Pierre, Pendragon (2003).
• 1990 - Pensieri libertini, a cura di Federico di Trocchio (sulle opere filosofiche inedite rinvenute a Dux). Rusconi Editore Milano.
• 1993 - Philocalies sur les sottises des mortels, a cura di Tom Vitelli. Salt Lake City.
• 1993 - Prosopopea Ecaterina II… a cura di Enrico Straub. Francoforte.
• 2005 - Dell'Iliade d'Omero tradotta in veneziano da Giacomo Casanova. Canti otto. Edizioni della Laguna.
• 2005 - Iliade di Omero in veneziano. Tradotta in ottava rima. Editoria Universitaria, Venezia.

Vałore leterario e fortuna de l'opara caxanoviana

Sol vałore letarario e ła vałidità storega de l'opara de Giacomo Casanova a se xe ciacołà parecio. Intanto a bisogna distinguare tra l'opara autobiografega e el resto de ła produsion. Malgrado i sforsi fati par acreditarse come łeterato, storego, fiłoxofo e adiritura matematico, Casanova no el ga avù in vita, e gnanca da morto, nisuna notorietà e nisun suceso. Ła so opara Ła xe sta de frecuente de ocaxion e i so scriti i xe sta creà par otenger on cualche beneficio: ła confutasion de l'opara de Amelot de la Housaye scrita in gran parte durante ła detension a Barcełona inte el 1768, ła gavarìa dovù servire, e infati a xe sta cusì, a ingraziarse el governo venesian e a otegnere ła tanto sospirà grazia.

Ło steso a se pò dire par opare scrite inte ła speransa de otegnere cualche incarico da Caterina II de Rusia o da Federico II de Prusia. Altre opare, come ł'Icosameron, łe gavaria dovesto sancire el succeso leterario de l'autore ma a no xe sta cusì. El primo vero suceso editoriałe el xe otegnù da l'Historia della mia fuga dai Pionbi che ła ga avù na difuxion ła gavaria na difuxion imediata e varie edision, sia in italian che in fransexe. A pare cuaxi che Casanova el tołerase łe so creature autobiografiche e el so suceso, continuando a inseguire, co opare non autobiografiche, on suceso leterario che no el xe mai rivà.

Sto aspeto el xe sta acutamente oservà da on memoriałista contenporaneo, el prinsipe Charles Joseph de Ligne, el cuałe el ga scrito che el fasino de Casanova el stava tuto inte i so raconti autobiografeghi, sia verbałi che trascriti, o sia sia ła narasion sałotiera che ła version stanpà de łe so aventure. Tanto el zera briłante e trasinante cuando cge el parlava de ła so vita - oserva de Ligne - cuanto teribilmente nojoxo, prołiso, banałe cuando che el parlava o scriveva so altre materie. Ma pare che cuesto, Casanova, non el gabia mai vołù acetarlo. El ghe ne sofriva tremendamente de non aver chel riconosimento leterario o mejo sientifego a cui el anbiva.

Da ciò a se po' conprendare l'astio inte i confronti de Voltaire (Casanova el ga scrito inte l'Histoire che Voltaire el zera on grande omo visto da distante, ma on omo picinin visto da visin), che el scondeva una profonda invidia e una sconfinata ammirazione. cuindi anche contro ła vołontà de l'autore, łe opare autobiografiche łe gavaria podesto esare on grande suceso editoriałe zà durante ła vita de l'autore. Ma ciò el xe avegnù in mixura ridota par vari motivi: prinsipalmente parché sto fiłone el xe sta scuminsià tardi.

Inoltre l'opara "vera", o sia cueła inte ła cuała el gaveva trasfuxo tuto sé steso, l'Histoire, ła xe sta scrita proprio inte i ultimi ani de vita e el motivo el xe senplice: infati łu steso el ga afermà, inte na łetara del 1791, indirisà a cuel Zuan Carlo Grimani, da łu ofexo tanti anni prima e che el zera sta ła cauxa del secondo bando: "…ora che la mia età mi fa credere di aver finito di farla, ho scritto la Storia della mia vita…". A pare o sia che par metare so carta tuto in forma definitiva, l'autore el dovese prima ametare co sé steso che ła storia ła zera terminà e de futuro davanti da vivare a no ghe ne zera più. Amision cuesta senpre dołoroxa par chiuncue, in particołare par on omo che el gaveva creà na vita-caołaoro iripetibiłe.

Ma on altro aspeto, cuesto struturałe, el ga ritardà ła fortuna de l'opara autobiografega: l'Histoire ła zera a l'epoca asołutamente inpublicabiłe. A no xe on caso che ła prima edision del manoscrito conprà da Heinrich Brockhaus de Lipsia inte el 1821 ła xe sta publicà, dal 1826 al 1838, parò inte na version notevolmente rimanegià da Jean Laforgue, el cuałe no el se ga łimità a "purgare" l'opara, tajando pasi ritegnù masa audaci, ma el xe intervegnù a tapeto modificando anca l'ideołogia de l'autore, faxendone na sorta de giacobin averso a łe ołigarchie dominanti. Ciò a no corispondeva afato a ła verità storega, parché de Casanova a se poe dire che el zera ribełe e trasgresivo, ma połiticamente el zera on fautore de ł'ancien régime, come a xe dimostrà ciaramente dal so epistołario, opare specifiche e ła stesa Histoire. Par l'edision definitiva de łe memorie a se ga dovesto spetare fin a cuando ła caxa Brockhaus ła ga decixo de publicare, insieme a l'editore Plon de Parigi (dal 1960 al 1962), el testo orixinałe in siè vołumi curà da Angelika Hübscher. Ciò el xe sta dovuo a l'inpianto generałe de l'opara, de on cinismo asołutamente inpresentàbiłe che incuò - invese - el se ciama modernità.

Casanova el xe el primo scritor de costume moderno. No el ga paura de rivełar situasion, inclinasion, atività, trame e soratuto confesion che ghe zera a l'epoca, e tałi łe xe restà oncora par secołi, asołutamente iriferibiłi. Naturalmente el primo problema, ma cuesto łimità a pochi ani dopo ła morte de l'autor, el xe sta cueło de aver cità personaji de primisimo piano, co sircostanse tanto precixe del so modo de conportarse. Łe memorie łe xe piene dei atori prinsipałi de ła storia eoropea del Setesento, sia cueła połitega che culturałe. Probabilmente a se farìa prima a dire de chi Casanova no el ga scrito, e chi che no el ga incontrà, tanto vasto el xe sta el panorama de łe so frecuentasion. Ma cuesto, come ca se ga dito, el xe marginałe. Ł'altro problema, cuesto insuperabiłe, a xe sta ła sostansiałe "imorałità" de l'opara caxanoviana.

Ma ciò el deve intendarse come contrarietà a łe abitudini, ai tic, a łe ipocrixie de ła fin del Setesento e, ancor de più, del sucesivo secolo, oncora pì fobico e par serti versi tanto manco verto de cueło che ło gaveva preceduto. Casanova el ga precorso i tenpi: el zera masa avanti par diventare on autor de suceso. E forse el se ne rendeva perfetamente conto. Inte ła letara a Zuan Carlo Grimani, ricordà in precedensa, Casanova, parlando de l'Histoire, el scrive testualmente: ...cuesta Storia, che verrà diffusa fino a sei volumi in ottavo e che sarà forse tradotta in tutte le lingue... E poi, el domanda na risposta …perché io posa porla inte i codicilli che formeranno il settimo volume postumo della Storia della mia vita. Tuto cuesto el se ga verificà puntualmente.

Ła fortuna de l'opara caxanoviana, preso i protagonisti de vertice de ła sena letararia mondiałe, ła xe sta ristreta soło a l'opara autobiografega e ła xe stata vastisima. Scuminsiando da Stendhal, al cuałe a xe sta atribuia ła paternità de ł'Histoire, a Foscolo che el ga meso adiritura in dubio l'existensa storega del Casanova, a Schnitzler, a Hofmannstahl, a Hese. Pareci i xe sta soło letori e cuindi influensà in modo inconsio, altri i ga scrito opare anbientà inte l'epoca de Casanova e de cui łu el zera protagonista.

A xe inposìbiłe i tanti riferimenti, inte ła łeteratura moderna, a sta figura che ła ga finio par diventar archetipica. In Itałia l'intareso el se xe manifestà tra łe fin del l'Otosento e i primi del Novesento. A xe intaresante notare che ła prima edision italiana de ła Historia della mia fuga dai Pionbi ła xe sta curà inte el 1911 da Salvatore di Giacomo, el cuałe el ga studià anca i tanti sojorni napołetani de l'aventuriero e su sto argomento el ga scrito on sajo. A xe seguìi Benedetto Croce e via via tanti altri fin a Piero Chiara.

On caitoło a parte el 'ndarìa dedicà ai "caxanovisti" o sia a tuti cuełi che i se xe ocupaà e i se ocupa, pì o manco profesionalmente, de ła vita e de l'opara del Casanova. Proprio a sta legion de anonimi a se deve infinite identificasion de personagi, revixion e inportantisimi ritrovamenti de documenti. Tanto de l'opara caxanoviana el xe oncora inedito, Inte l'Archivio de Stato de Praga a xe restà sirca 10.000 documenti che i speta de esare studià e publicà, oltre on numaro inprecixà de letare che probabilmente łe xe sepełìe in chisà cuanti archivi de fameja sparsi par l'Eoropa.

Riguardo al mito del sedutor, Casanova, insieme a Don Giovanni, el ne xe sta l'incarnasion. El paragon el xe d'obligo e el xe sta tema de numaroxe opare critiche. Łe do figure łe xe finìe adiritura par fondarse benché antitetiche. A parte el fato che el venesian el zera on personajo reałe e l'altro romanzesco, i du caratari i xe ai antipodi: el primo el amava łe so concuiste, el se prodigava co generoxità par farle contente e el sercava senpre de vegnerghene fora co on serto stiłe, łasandose de drio na sìa de nostalgia. Ł'altro invese el rapresenta el cołesionista puro, pì mortifaro che vitałe, asołutamente indifarente a l'imagine de sé e soratuto ai efeti del so agire, concentrà unicamente sol numaro de łe vitime de ła so sedusion.

Ł'interpretasion del so mito, secondo alcuni, ła sarìa sta fornia proprio dal łibreto del Don Giovanni de Mozart, scrito da Lorenzo da Ponte, dove Leporello, el servo de Don Giovanni, inte 'n'aria notisima el recita: Madamina il catalogo ze cuesto, delle belle che amò il padron mio… e prosegue snociołando łe concuiste sensa numaro, diłigentemente registrae. El fato che a ła redasion del libreto a pare gabia partesipà anca Casanova - come tałuni i sostien baxandose so documenti catà a Dux, sol fato che da Ponte e Casanova i se frecuentava e che l'aventuriero el fuse sicuramente presente ła sira inte ła cuała a Praga a xe 'ndà in sena ła prima de l'opara mozartiana (29 de otobre 1787) - a xe tuto somà marxinałe. cuel ca xe serto a xe che Casanova el se ga misurà col mito de don Giovanni e el ne ga costruìo uno oncora pì grande, sertamente pì poxitivo e soratuto reałe.

Bibliografia

Ełenco de opare ordinae alfabeticamente par autore.

• aa.vv. - Il mondo di Giacomo Casanova, ed. Marsilio (1998), catałogo de ła mostra a Ca' Rezzonico.
• Louis Jean André - Memoires de l'Academie des sciences, agriculture, arts & belles lettres d'Aix. Tome 6. Aspects du XVIII° siecle aixois. ISBN 2-906280-07-0 Ed. Académie d'Aix 1999.
• Robert Abirached - Casanova o la disipazione, ed. Sellerio (1977).
• Luigi Baccolo - Casanova e i suoi amici, ed. Sugar (1972).
• Luigi Baccolo - Vita di Casanova, ed. Rusconi (1979).
• Elio Bartolini - Casanova (dalla felicità alla morte 1774/1798), ed. Mondadori (1998).
• Elio Bartolini - Vita di Casanova, ed. Mondadori (1998)
• Giuseppe Cengiarotti - Gli ultimi anni di Giacomo Casanova in Boemia. Note storiche 1785-1798, ed. Atheneum (1990)
• Virgilio Boccardi - Casanova. La Venezia segreta, Filippi editore Venesia (2000).
• Bruno Capaci - Le impresion delle cose meravigliose. Giacomo Casanova e la redenzione imperfetta della scrittura, Marsilio (2002).
• Piero Chiara - Il vero Casanova, Mursia (1977).
• Giovanni Comiso - Agenti segreti di Venezia 1707-1797, ed. Bompiani (1945).
• Stefano Cosma - Il castello di Spesa a Capriva del Friuli, una lunga vacanza di Giacomo Casanova. Edizioni della Laguna (2004).
• Carlo Curiel, Gustavo Gugitz, Aldo Ravà - Patrizi e avventurieri, dame e ballerine in cento lettere inedite o poco note. Miłan, Corbaccio, (1930].
• Carlo Curiel - Trieste settecentesca, ed. Sandron (1922).
• Marina Cvetaeva - Phoenix, ed. Archinto (2001).
• Lorenzo Da Ponte - Memorie, ed. Garzanti (1976).
• Gino Damerini - Casanova a Venezia, ed. Ilte (1957).
• Alesandro D'Ancona - Viaggiatori e avventurieri, ed. Sansoni (1974).
• Alesandro D'Ancona - Casanoviana, ed. Crescenzi Allendorf (1992).
• Charles Joseph De Ligne - Aneddoti e ritratti, ed. Sellerio (1979).
• Fabbri Dall'Oglio M.A., Fortis A. - Il gastronomo errante Giacomo Casanova, ed. Ricciardi & Asociati (1998).
• Federico Di Trocchio e Romano Forleo - Casanova e le ostetriche, ed. Centro scientifico (2000).
• Giorgio Ficara - Casanova e la malinconia, ed. Einaudi (1999).
• Lydia Flem - Casanova. L'uomo che amava le donne, davvero, ed. Fazi (2006).
• Louis Furnberg - Mozart e Casanova, ed. Sellerio (1993).
• Roberto Gervaso - Casanova, Rizzoli (1974).
• Luca Goldoni - Casanova romantica spia, ed. Rizzoli (1997).
• Herman Hese - La conversion di Casanova, ed. Guanda (1989).
• Jean Didier Vincent - Casanova il contagio del piacere, ed. Canal (1998).
• Marco Leeflang, Utrecht, Marie-Françose Luna, Grenoble, Antonio Trampus, Trieste (a cura di) - Lettres de Francesca Buschini ga G. Casanova (1996).
• Jaccues Marsan - Sui pasi di Casanova a Venezia, Idealibri (1994).
• Andrei Miller - Casanova innamorato, ed. RCS libri (2000).
• Pompeo Molmenti - Epistolari veneziani del secolo XVIII. Palermo ([[[1914]]).
• Pompeo Molmenti - Carteggi casanoviani. Vol I, Lettere di G.Casanova e di altri a lui. Pałermo (1916).
• Pompeo Molmenti - Carteggi casanoviani. Vol II, Lettere del patrizio Zaguri a G.Casanova. Palermo (1918).
• Federico Montecuccoli degli Erri - Cammei casanoviani. Ginevra (2006).
• Sandro Pascual, - L'intreccio, Casanova a Bologna. Ed. Tratti/Mobydick 2007.
• Gilberto Pizzamiglio (a cura di) - Giacomo Casanova tra Venezia e l'Europa, ed. Leo S. Olschki (2001).
• Aldo Ravà (a cura di) - Lettere di donne a G. Casanova, ed. Fr. Treves (1912).
• John Rives Child - Casanova, ed. AREA (1962).
• Margherita Sarfatti - Casanova contro Don Giovanni, ed. Mondadori (1950).
• Giuseppe Scaraffia - Il mantello di Casanova, ed. Sellerio (1989)
• Riccardo Selvatico - Cento note par Casanova a Venezia (1753-1756), ed. Neri Pozza (1997).
• Francesca Serra - Casanova autobiografo, ed. Saggi Marsilio (2001).
• Francesco Sgarlata - I pensieri di Casanova. Vademecum del libertino contemporaneo. Ed. della Laguna 2006.
• Philippe Sollers - Il miràbiłe Casanova, ed. Il saggiatore (1998).
• Enrico Straub - Rapporti di G.C. co i paesi del Nord ed. Venezia (1978).
• Judith Summers, Casanova's women. The great seducer and the women he loved, ed Bloomsbury, London 2006.
• Sebastiano Vasalli - Dux, ed. Einaudi (2002)
• Eugenio Vittoria - G. Casanova e gli Incuisitori di Stato, ed EVI (1973).
• Stefan Zweig - Tre poeti della propria vita: Casanova…. ed. Sperling & Kupfer (1945).

Rivista

• L'intermédiaire des casanovistes - anuałe. Edita da M. Leeflang (Utrecht), F. Luccichenti (Roma), M.F. Luna Grenoble, E. Straub (Berlin), A. Trampus (Trieste), T. Vitelli (Salt Lake City), H. Watzlavick (Vernier).

Łigamenti foresti

• (EN) Documentasion e bibliografia
• Sagio di Barbara Evers-Rothgangel sora ła vera identità de Suor M.M.
• El casteło Waldstein di Dux Archivià il 27 de setenbre 2008 in Internet Archive.

• Sito de studi caxanoviani Archivià l'11 de lujo 2006 in Internet Archive.

• Sito co itinerari caxanoviani a Parigi
• (FR) Testo dell'Histoire edizione 1880
• Il duello Testo itałian
• Ła Vita de Giacomo Casanova mostrà co ła Łanterna Magica Archivià il 14 de novenbre 2007 in Internet Archive.

Altri progetti

• Wikimedia Commons

• Wikimedia Commons el detien imàjini o altri file so Giacomo Casanova
• el detien schemi gràfeghi so