Belii (lidn)

Belii
Белый

Lidnanznam
Valdkund	Venäma
Eläjiden lugu (2021)	3,125 ristitud
Pind	17,56 km²
Telefonkod	+7−48 250-xx-xxx
Avtokod	69
Aigvö	UTC+3 (MSK+0)

Belii (ven.: Бе́лый «vauged») om Venäman lidn Tverin agjan suvipäivlaskmas. Se om Belijan ümbrikon (edel 2023. vot rajonan) administrativine keskuz.

Istorii

Eländpunkt om tetab 13. voz'sadaspäi, eziauguižešti kut Belai-lidnuz (ven.: крепость Белая) Smolenskan ruhtinazkundas, möhemba oli ičeze ruhtinazkundan pälidnaks. Sai nimitust jogen mouckivižiden randoiden mujun tagut ezimeletaden. Vozil 1355−1654 lidnuz mülüi 150 vot Litvanmaha, sid' Venämaha i Reč Pospolitai-valdkundha. Vl 1634 Smolenskan sodan aigan Reč Pospolitajan kunigaz oli satatadud venämalaižiden londan satuseks Belai-lidnusespäi.

Vl 1708 Belii sai makundan lidnan statusad. Suren sodan aigan lopihe okkupacijad vn 1942 29. päiväl vilukud. Vl 1944 lidn oli mülünu Velikije Lukin agjaha, vspäi 1957 alištub Tverin agjan tobmudele.

Belii-lidn šingotase mecan ümbriradmižel pilindmaterialoihe.

Geografijan andmused

Lidn sijadase ümbrikon keskuzpalan päivlaskmas, Obš-jogen randal (ven.: О́бша 153 km pitte, Päivlaskmaižen Dvinan hurapol'ne bassein), 185 m ü.m.t. keskmäižel korktusel.

Matkad Smolenskan agjhasai om 20 km suvhe, Tverihesai om 294 km pohjoižpäivnouzmha. Lähembaine lidn om Nelidovo 45 km pohjoižhe orhal vai 52 km avtotedme.

Tobmuz

Belii oli enččen lidnankundan üks'jäižeks eländpunktaks.

Lidnan Deputatoiden nevondkund om likvidiruidud vn 2024 vilukus, sen jäl'gmäine ezimez' oli Natal'ja Smirnova. Lidnankundan Administracii om likvidiruidud vn 2023 kezakus, Irina Kolmikova radoi sen jäl'gmäižen pämehen (Ирина Колмыкова, tal'vku 2015 — viluku 2023).

Eläjad

Vn 2010 Venäman rahvahanlugemižen mödhe lidnan eläjiden lugu oli 3 772 ristitud, rajonan koume videndest. Kaik 3 268 ristitud elihe lidnas vl 2017. Kaikiš suremb lidnan ristitišt oli 13 600 eläjad vl 1913, Suren sodan jäl'ghe — 5 300 eläjad vozil 1992−1996.

Rahvahad (vl 2021): venälaižed — 98,3 %, toižed rahvahad — 0,1 %, rahvahuden ozutandata — 1,6 %.

Ortodoksižen hristanuskondan viž pühäpertid oma kaičenus i saudud lidnas: koume jumalanpertid (phh. Petran i Paulan vanh da uz', ph. Panteleimon-spravitajan), ph. Aleksandr Nevalaižen kodipühäpert' enččenno hengeližškolanno, časoun'. Niiden ližaks seičeme pühäpertid oma pandud mantazole: Eläban Eziauguižen Stroican päjumalanpert', nell' jumalanpertid, kaks' časounäd.

Professionaližen opendusen aluzkundad ratas lähembaižiš lidnoiš.

Galerei

• 
  Rajonan administracijan sauvuz vl 2007
• 
  Puišt (2013), amuižen lidnan sijaduz
• 
  Municipaližiden aluzkundoiden pert' (2007, augotižškol, sportškol, kaluišton ohjandusen komitet; ende naižgimnazii)
• 
  Belijan kodirandantedištandmuzei (2021)

Irdkosketused

• Belijan kodirandantedištandmuzei tvermuzeum.ru-saital. (ven.)