反義詞
(由分級反義詞跳轉過嚟)
反義詞（粵音：faan2 ji6 ci4），又叫相反詞，係語言學上嘅一種對比手法，係指某一對字詞有相反嘅意思或者定義，例如：有同冇、鍾意同憎、凍同熱... 等都係反義詞。一種語言入面嘅所有詞彙唔一定都有對應嘅反義詞，例如助詞、量詞、數詞、嘆詞、擬聲詞等一般都冇相反詞。
仲有一啲因為冇反義或者反義比較模糊而又冇相應嘅反義詞嘅詞彙。但係大部分語言嘅反義詞屬於形容詞、名詞同動詞嘅詞彙，而且反義詞同同義詞普遍存在喺所有嘅人類語言入面。
一般嚟講，某詞對應嘅反義詞未必只有一個，而會包含所有反義詞嘅同義詞在內。例如年少、年幼、後生等都可以算係老嘅反義詞，因為佢哋彼此之間都係同義詞。
之不過，因為好多詞彙喺唔同場合都可以有唔同嘅定義，所以可能有一個詞對應多數完全唔同嘅反義詞嘅情況出現。因此有啲特定嘅詞可以有幾個完全唔同定義嘅反義詞，例如白嘅反義詞喺唔同場合分別可能係黑（例如白色同黑色）紅（例如白事同紅事，或白軍同紅軍）文（例如白話同文言）等唔同意義嘅詞匯[未記出處或冇根據]。
分級反義詞
[編輯]分級反義詞（graded antonym）呢個語言學概念，通常淨係適用於形容詞。如果話 A 同 B 係分級反義詞，意思係話兩隻字形容緊某個連續變數嘅兩極，例如
- 溫度係個連續變數，熱同凍呢兩隻字形容緊溫度嘅兩極，所以係分級反義詞；
- 又例如重量係個連續變數，輕同重呢兩隻字形容緊重量嘅兩極，所以係分級反義詞；
- 又例如長度係個連續變數，長同短呢兩隻字形容緊長度嘅兩極，所以係分級反義詞[1]。
常用反義詞
[編輯]| 大 | 細 |
| 多 | 少 |
| 重 | 輕 |
| 上 | 下 |
| 左 | 右 |
| 前 | 後 |
| 凍 | 熱 |
| 高 | 低 |
| 好 | 差 |
| 進 | 退 |
| 賺 | 蝕 |
| 有 | 冇 |
| 新 | 舊 |
| 贏 | 輸 |
| 懷疑 | 相信 |
| 早到 | 遲到 |
| 高興 | 掃興 |
| 靚 | 醜樣 |
| 進化 | 退化 |
| 準時 | 延後 |
| 守信 | 失信 |
| 尊重 | 侮辱 |
| 名副其實 | 名不副實 |
| 雪中送炭 | 雪上加霜 |
| 言而有信 | 言而無信 |
睇埋
[編輯]引咗
[編輯]- ↑ Cruse, D. Alan. (1992). Antonymy revisited: Some thoughts on the relationship between words and concepts. In A. J. Lehrer & E. F. Kittay (Eds.), Frames, fields, and contrasts: New essays in semantic and lexical organization (pp. 289-306). Hillsdale, NJ: Lawrence Erlbaum Associates.