紐西蘭

紐西蘭 New Zealand（英文） Aotearoa（毛利文）
旗 徽
國歌：God Defend New Zealand （英文） Aotearoa （毛利文） 《天佑紐西蘭》 God Save the King （英文） E Te Atua Tohungia Te Kīngi （毛利文） 《天佑吾王》
深綠色係紐西蘭同海外領土托克勞（最北部） 淺綠色係宣稱但唔被承認嘅南極領地
屬地（實轄）
幅員 國土：268,021平方公里（世界第75名） 水域：1.6%
首都	威靈頓
最大城市	屋崙
時區	UTC+12 夏令時：UTC+13
國民
人數	以下係2024年嘅估計數字 人數： 5,387,686 人口密度：19.5/km2
官方語言	英文 毛利文 紐西蘭手語
民族	74.0% 歐裔 14.9% 毛利人 11.8% 亞裔 7.4% 太平洋島民 1.2% 中東、拉美裔同非洲裔 1.7% 其他
主要宗教	基督教、毛利人泛靈論信仰等
行車方向	靠左行駛
政制
政制	單一制 君主立憲制 議會民主制 自由民主制 西敏制
主要領袖 國家元首（君主）：查理斯三世 政府首腦（總理）：Christopher Luxon
經濟
GDP（購買力平價） 以下係2023年嘅估計數字 總計：▲ $2,791.83億（第63名） 人均：▲ $53,809（第32名）
GDP（國際匯率） 以下係2023年嘅估計數字 總計：▲ $2,494.15億（第51名） 人均：▲ $48,071（第23名）
HDI 以下係2023年嘅估計數字 ▲ 0.939（第16名）－極高
貨幣	紐西蘭元（NZD，$、NZ$）
堅尼系數	▼ 30.0 中
資訊
立國歷史 立國日期：1947年11月25號 立國事件：西敏法令
國家象徵	國花：銀葉蕨 國鳥：鷸鴕（即奇異鳥，係當地特有鳥種之一）
國家代碼	NZL
國際域名縮寫	.nz
國際電話區號	+64
現役軍人數	8,669 3,260（預備役）

紐西蘭（粵拼：nau2 sai1 laan4，毛利文：Aotearoa，英文：New Zealand），又叫做新西蘭（san1 sai1 laan4），老華僑叫鳥施崙或者鳥思倫新金山，係一島國，太平洋西南。紐西蘭嘅兩個主要島嶼畀庫克海峽隔開，又同澳洲相距大約1600公里。喺佢嘅南部就係南極洲，北部就同斐濟同埋湯加兩個島國隔海相望。紐西蘭人自稱Kiwi，即係奇異鳥（鷸鴕），係紐西蘭獨有嘅雀，紐西蘭國鳥。

佢嘅毛利文名「奧特亞羅瓦」（Aotearoa）本來淨係指北島，而今指成個紐西蘭，意思係「長白雲之鄉」。

歷史

紐西蘭係最新成立嘅移民國家之一。波里尼西亞移民喺大概1200年到1300年期間抵達紐西蘭，形成當地原住民毛利人。

第一批已知抵達紐西蘭嘅歐洲人係由荷蘭人亞伯·塔斯曼（Abel Janszoon Tasman）帶領嘅船隊，喺1642年航抵南北島嘅西岸。荷蘭人唔知道南北島係分開嘅，所以全部命名為Staaten Landt（州地）。後嚟先至根據佢哋喺印尼巴塔維亞嘅基地改名為Nieuw Zeeland。而嗰個巴塔維亞基地就係根據荷蘭嘅澤蘭省而命名嘅。

1769年占士曲（James Cook）開始仔細咁研究紐西蘭，佢先後三次到訪南太平洋同埋紐西蘭，重為紐西蘭畫咗張地圖。但係喺最初嘅地圖版本入面，佢將斯圖爾特島當成係一個半島，而將班克斯半島畫成一個島。曲船引致歐洲捕鯨船喺紐西蘭海域嘅擴增，推動紐西蘭最終成為歐洲殖民地。

紐西蘭因為《懷唐伊條約》（Treaty of Waitangi）喺1840年成為英國嘅殖民地。懷唐伊條約有英文同毛利文版，英國皇室代表簽嘅係英文版，毛利族簽嘅係毛利文版。毛利文版嘅懷唐伊條約答應畀紐西蘭毛利族群「tino rangatiratanga」。呢個詞語喺英文版嘅懷唐伊條約對應嘅字眼係 ｢絕對擁有權｣（full ... possession），但係喺毛利文就係「自治」嘅意思。由於大家嘅領會唔同，呢個詞語同埋其他嘅一啲問題至今仍然造成政府同埋毛利族群之間嘅芥蒂。譬如關於《海牀和前灘的所有權》歸屬問題。

1907年紐西蘭從殖民地變成英國嘅一個自治領。其後半世紀內，紐西蘭逐漸更改地位至主權完整嘅英聯邦王國。

2015年9月2號，紐西蘭政府官方網站決定喺2016年初用新嘅國旗方案，呢次新嘅國旗方案將會用蕨類植物取代原有嘅英聯邦符號，重喺2016年通過全民公投嚟確定係咪用帶有蕨類植物符號嘅國旗。但喺2016年3月嘅第二次公投，超過五成六人支持用返原本嘅國旗。

地理同埋政區

内文：紐西蘭地理

紐西蘭主要由北島同南島組成。南島係紐西蘭面積最大嘅島。南阿爾卑斯山脈縱貫南島，有好多冰川，最高峰係庫克山，海拔3,754米，亦係紐西蘭嘅最高峰。北島嘅山峰比南島少，並且大多係火山，亦都比較多人住。與世隔絕嘅陸地孕育獨特生態環境，尤其係唔曉飛嘅雀，例如奇異鳥。但係地質上，佢唔係「與世隔絕」，佢所在嘅「西蘭大陸」祇不過沉沒咗，其實範圍有兩個格陵蘭咁大。

紐西蘭劃分為十七地區，其中五區係一元權力機構，下面帶有星號者，破折號後面係主要城市，第一個通常係嗰個地區嘅地區議會所在地。

• 北地大區 - 旺格雷
• 屋崙大區 - 屋崙
• 懷卡托 - 漢密爾頓、陶波
• 豐盛灣 - 羅托路亞
• 吉斯伯恩*
• 豪克斯
• 塔拉納奇
• 馬努瓦圖-旺格紐伊 - 北帕
• 威靈頓
• 馬爾堡* - 布尼蘭姆
• 尼爾遜*
• 塔斯曼*
• 西岸 - 格雷茅斯
• 坎特伯雷 - 基督城
• 奧塔哥地區 - 但尼丁
• 南地大區
• 查塔姆群島

政治

内文：紐西蘭政治

紐西蘭係一個君主立憲制國家。紐西蘭國王查理斯三世係國家元首，由總督代表，總理大臣就係政府首長。紐西蘭無成文憲法。

紐西蘭實行一院制議會：眾議院，通常有120席個席位。議會選舉每三年舉行一次，選舉採用混合比例制度（Mixed Member Proportional），每個政黨按照政黨選票比例分配席位。喺2005年嘅全國大選入面，毛利黨所贏得嘅選區議席多過佢哋嘅政黨選票，所以議會而家有121席。

議會入面嘅政黨主要有工黨（Labour Party），國家黨（National Party）同埋一啲細黨。通常大嘅黨派都贏唔到半數以上嘅席位，所以一定要同細黨合作，組成聯合政府。

紐西蘭歷史上在位最長嘅總理大臣係工黨嘅海倫·克拉克，已經連任三屆。

經濟

内文：紐西蘭經濟

紐西蘭經濟發達，屬於發達國家。紐西蘭有好高嘅生活水平，喺聯合國人類發展指數入面排第19。

喺過去嘅二十年入面，紐西蘭好成功咁由一個依靠農業為主嘅經濟轉型為具有國際競爭力嘅工業化自由市場經濟。

雖然農業只係佔總勞動力嘅10%，但係紐西蘭嘅出口產品仍然以農產品為主，例如乳製品、肉類、漁產品等等。

教育

内文：紐西蘭教育

紐西蘭兒童五歲入學，法定教育一共13年：其中小學六年，初中兩年，高中五年。

紐西蘭總共有八間正式大學，按照地理位置由北至南分別係：

北島：

• 屋崙大學（http://www.auckland.ac.nz）
• 屋崙理工大學（http://www.aut.ac.nz）
• 懷卡託大學（http://www.waikato.ac.nz）
• 梅西大學（http://www.massey.ac.nz）
• 威靈頓維多利亞大學（http://www.vuw.ac.nz）

南島：

• 坎特伯雷大學（http://www.canterbury.ac.nz）
• 林肯大學 (紐西蘭)（http://www.lincoln.ac.nz）
• 奧塔哥大學（http://www.otago.ac.nz）

每個地區都分別有理工學院同教育學院，重有唔同種類嘅高等教育機構。除此之外重有政府資助，喺毛利文化環境入面教育嘅高等教育機構Te Wānanga o Aotearoa[1]，意思係「長白雲之鄉學院」，喺北島每一度都有分校，總部喺漢密爾頓，但係目前只有大概一半學生係毛利人。

人口

内文：紐西蘭人口

紐西蘭嘅人口大概係4,134,200人（2006年3月估計），4,116,900人（2006年嘅人口普查初稿），其中屋崙嘅人佔咗大約三份之一，大部份人住喺北島。

• 屋崙嘅人口 1,223,200人
• 威靈頓嘅人口 363,000人 （2003年）
• 基督城嘅人口 363,700人（2004年）
• 但尼丁嘅人口 120,000人

紐西蘭係多元民族嘅國家，除咗英裔嘅人之外，主要有五十幾萬毛利人（土著）同埋十四萬華人，另外有五萬薩摩亞人，三萬個法裔居民同埋二萬個韓裔居民。全紐西蘭有成一百幾十個民族.

文化

• 毛利人戰舞

旅遊

喺聯合國教科文組織嘅世界遺產目錄入面紐西蘭一共有三個世界遺產，其中東格里羅國家公園係自然文化雙重遺產，而其餘嗰兩個就係自然遺產。

• 東格里羅國家公園（nc，1990年，1993年）
• 紐西蘭西南部嘅「綠玉之地」（毛利文：Te Wahipounamu）- 呢度包括「西地國家公園」、「庫克山國家公園」、「愛詩勃林山國家公園」、「弗儸德蘭國家公園」同埋米爾福德峽灣（n，1990年）
• 紐西蘭嘅次南極群島（n，1998年）

其它旅遊景點

• 陶波湖
• 紐西蘭螢火蟲洞（Waitomo Caves）

生態

内文：紐西蘭鳥類

畫家筆下昔日哈斯特鷹捉恐鳥嚟食嘅情景

鴞鸚鵡，紐西蘭嘅特有品種

紐西蘭喺世界動物地理分區上屬於澳大拉西亞區。由於同澳洲大陸一樣喺早期就同其他大陸分離，因此產有好多特有種（67種）。現時記低約有340種鳥類。

除咗三種蝙蝠（現存兩種）外，紐西蘭再無任何原生哺乳動物，因此紐西蘭嘅鳥類極端特化，並佔據咗生態系統嘅所有位置；例如恐鳥扮演咗鹿或牛嘅角色，哈斯特鷹（或者叫紐西蘭鷹，有史以來最大的猛禽）就扮演咗豹或老虎嘅角色。

當人類喺800年到1300年到達紐西蘭後，呢啲獨特嘅生態系統開始瀕臨危機。幾個鳥類品種被人捕獵至絕種；然而，大部份嘅破壞其實係由人類帶來嘅其他哺乳動物所造成，尤其係老鼠，另外重有狗、貓、鼬鼠、刺蝟同澳洲袋貂等，飛唔到嘅鳥類（例如奇異鳥）特別咁面臨絕種嘅危機。

大概三分之二嘅雀仔絕種係喺毛利人嚟到之後先發生，其餘嘅就係喺白人嚟到之後。

其它

• 紐西蘭銀行嘅營業時間係：朝早8:30 - 晏晝4:30。（個別銀行可能會有啲唔同）
• 工作時間係星期一至星期五嘅朝早9點到到晏晝5點。
• 紐西蘭貨幣為紐西蘭元。硬幣有5仙、10仙、20仙、50仙、1蚊同埋兩蚊。銀行已經唔再發行5仙，重將10仙、20仙同埋50仙嘅硬幣尺寸改細咗。紙幣有5蚊、10蚊、20蚊、50蚊同埋100蚊。商鋪接納大多數嘅主要信用卡。紐西蘭對所有商品同埋服務徵收12.5%嘅消費稅。
• 紐西蘭嘅電源用230伏特、50赫茲嘅交流電，3眼Y型插座（外型同澳洲同埋大陸嘅插頭一樣，只係電壓唔同，但係一般嘅電器都可以喺紐西蘭用）。
• 紐西蘭嘅電話系統同英國一樣，採用BT 600接口而唔係RJ-11接口。電話線駁喺BT 600接口嘅第2同第5條線上，或者喺RJ-11接口嘅第3同第4條線上。大多數紐西蘭電話系統都支援DTMF音頻撥號。
  • 請注意：紐西蘭嘅脈衝撥號係同世界上大多數國家相反嘅。

出面網頁

• 〈国家概况 — 中华人民共和国外交部〉 (簡體中文)。中華人民共和國外交部。
• 〈紐西蘭 New Zealand - 亞太地區 - 中華民國外交部 - 全球資訊網 Ministry of Foreign Affairs, Republic of China (Taiwan)〉 (繁體中文)。中華民國外交部。
• "New Zealand - United States Department of State" (英文). 美國國務院.
• 紐西蘭喺中央情報局《世界概況》嘅資料 （英文）
• 〈ニュージーランド ｜ 外務省〉 (日文)。日本外務省。
• "New Zealand - Department of Foreign Affairs and Trade" (英文). 澳洲外交貿易部.
• 紐西蘭地圖（中文）
• OpenStreetMap上面有關紐西蘭嘅地理資訊