烏利·冠拿·索薩

烏利·冠拿·索薩（挪威文：Ole Gunnar Solskjær，挪威文讀音：[ulɛ ɡʉnnɑʀ solʃæʀ]^[1]；1973年 2月26號—），又譯烏利·涓拿·蘇薩，香港媒體又譯奧利·根拿·蘇斯克查^[2]，係退役嘅挪威足球員，打前鋒，喺挪威克里斯提晏孫迪（Kristiansund）出世。

球員生涯

索薩喺職業球員生涯初期效力挪威國內球會，憑出色嘅入波能力贏咗「挪威舒利亞」嘅稱號，重引起國外球探注意。1996年夏天，英格蘭超級足球聯賽球隊曼聯個領隊阿力士·費格遜用150萬英鎊買咗佢。

索薩效力曼聯第一季，有好多次上陣機會，首場聯賽上陣對布力般流浪入咗一球，重喺1996/97球季以19球成為球隊首席射手，重攞埋嗰季聯賽冠軍。

之後曼聯陸續簽下韋治約基、舒寧咸等前鋒，蘇斯克查不時要擔任後備，但佢喺有限嘅上陣時間內依然可以保持高入球率，令佢得到「後備殺手」/「超級後備」嘅稱號。一張孩子臉，亦令佢得到另一個綽號：「娃娃臉殺手」——即使佢本人並唔鍾意呢個稱呼。

1998年嘅法國世界盃決賽週，蘇斯克查為挪威足球代表隊上陣，打入16強。

1998/99球季，索薩喺對諾定咸森林大勝8比1一場，後備上陣短短十二分鐘內入咗四球。佢喺歐洲聯賽冠軍盃決賽補時階段射入致勝一球，令曼聯反勝拜仁慕尼黑2比1，戲劇性完成三冠王霸業。跟住兩季，蘇斯克查分別射入14球。其中1999年12月主場贏愛華頓5比1嘅賽事再入咗4球。

2001/02球季，佢嘅入波數字再次上升到25球，連同嗰季加盟嘅雲尼斯杜萊所入嘅36球，兩人夾埋入咗61球，成為球會史上最多產嘅組合之一。

2002/03球季，隨住碧咸同費格遜關係出現緊張，蘇斯克查開始轉型，有時被安排墮後打右中場。

2003年9月索薩喺歐聯分組賽對彭拿典奈高斯射入佢喺球會嘅第115球之後，因膝部受傷離場，之後一直養傷到季尾至短暫復出，當中包括足總盃決賽贏米禾爾一場。

2004/05球季，索薩不斷受到膝部傷患困擾，成季都唔出得。做過幾次手術後，佢終於喺2005年12月底復出，並喺兩場足總盃賽事中上陣。

2006年3月，索薩同曼聯簽訂一份兩年新合約到2008年，球會重會畀佢執教嘅機會。8月23號，喺對查爾頓嘅英超賽事後備上陣，射入三年來首個正式比賽入波。佢復出之後入波威力仍然強勁，佢5次正選、6次後備上陣中入到6球，除咗成為當時曼聯首席射手外，佢亦係嗰季聯賽當時入波率最高的嘅球員。

2006/07球季之後，索薩做咗膝部手術，但始終都好唔返晒，卒之喺2007年8月宣佈掛靴。