Latakia

Latakia اللَاذِقِيَّة (al-Lādhiqīyah)
Stad
Seël
Latakia Ligging in Sirië
Koördinate: 35°31′25″N 35°47′30″O
Land	Sirië
Oppervlak
• Totaal	58 km2 (22 vk. myl)
Hoogte	35 m (115 ft)
Bevolking
• Totaal	402 700
• Stedelike digtheid	6 943/km2 (17 980/vk. myl)
Tydsone	UTC+2:00 (OET)
• Somertyd	UTC+3:00 (OEST)
Webwerf	eLatakia

Latakia (soms ook Latakiyah of Lathaqiya, of Latakieh volgens die plaaslike transliterasie) is die belangrikste seehawe van Sirië en die hoofstad van die gelyknamige administratiewe gewes.

Naas sy ekonomiese funksie as hawestad is Latakia ook 'n belangrike nywerheidsentrum vir omliggende landelike nedersettings. Met 'n bevolking van meer as 400 000 is Latakia die vyfde grootste stad in Sirië na Aleppo, Damaskus, Homs en Hama.

Alhoewel die gebied van Latakia reeds sedert die tweede millennium v.C. bewoon is, is die huidige stad eers in die 4de eeu v.C. onder die Seleukiede-bewind gestig. Dit het later onder Romeinse gesag gekom en vanaf die 8ste tot die 10de eeu deel uitgemaak van die Oemajade- en Abbasiede-ryk. Die hawe is in hierdie tydperk dikwels deur die Bisantyne aangeval en tydelik ook ingeneem voordat dit weer deur die Arabiere, veral die Fatimiede, verower is.

Latakia is later deur die Turkse Seldjoeke, Kruisvaarders, Ajoebiede, Mameloeke en Ottomaanse Turke ingeneem. Ná die Eerste Wêreldoorlog het Latakia deel geword van die Franse mandaatsgebied Sirië waar dit as administratiewe setel van die outonome Alawiete-gebied gedien het. Hierdie gebied is in 1922 in 'n Alawiete-staat omgeskep en het verskeie kere sy onafhanklikheid verklaar voordat dit in 1944 weer by Sirië ingesluit is.

Die huidige hawegeriewe het vanaf die 1950's ontstaan nadat ander seehawens ná Israel se onafhanklikwording in 1948 en die opsegging van die doeane-ooreenkoms met Libanon in 1950 vir Siriese in- en uitvoere nie meer maklik toeganklik was nie. Die uitbou van Latakia as moderne seehawe het gepaard gegaan met 'n vinnige bevolkingsgroei.