James Joyce

Quest articol chì l'è scrivud in lombard, con la Noeuva Ortografia Lombarda

El James Joyce (circa 1918)

El James Augustine Aloysius Joyce (Dublin, 2 de febrar del 1882 – Zurigh, 13 de genar del 1941) l'è stad un scritor, poeta e dramaturgh irlandes. L'è stad important fiss per el desvilup de la leteradura europeja del noeuv-cent, soratut per la correnta leteraria del modernism, grazzia ai so esperiment lenguistegh e ai noeuve tecniche dovrade 'me el "fluss de conscenza", el "monologh de dent" e l' "epifania"

El Joyce el se sentiva minga un irlandes d'orgoeuj: el preferiva vesser un europee. In de la regolta Dubliners el descriv la "paralisi" di citadin irlandes, che inn minga bon de sortì de quella condizzion chì. El scritor, ancaben la so educazzion catolega, el se s'cera contra a la Gesa catolega.

Biografia

L'è nassud in d'un soborgh elegant de Dublin de una fameja assee catolega, e l'era el pussee grand de 10 fradei restad in vita, desgià che du eren mort de tifo. A l'è stad educad in di scoeule di gesuita, inanz de andà dent in de l'University College de la cità, indova che 'l s'è lauread in del 1902 lengov moderne, in particolar ingles, frances e italian. Andad a Paris per deventà dotor a la Sorbona el gh'ha de tornà indree in del 1903 a causa de la malatia de la mader. In del giugn del 1904 el cognoss la Nora Barnacle, la so futura mier, e el dì del so prim pontell del lor el sarà dovrad del scritor 'me 'l temp del so romanz Ulysses: el Bloomsday. In del 1905 la cobia la se sposta a Triest, indova che el Joyce l'insegna ingles e el cognoss l'Italo Svevo. In del 1915 el se sposta a Zurigh a causa de la ocupazzion austriega de la cità furlana. In del 1920 el va a Paris, indova che in del 1922 la ven publegada una prima edizzion de l'Ulysses, che 'l dovarà spetà fina al 1934 per la so edizzion americana e fina al 1937 per quella britanega. Quand che la Francia la ven ocupada di todesch in del 1940, el Joyce El torna a Zurigh, indova che 'l morarà l'ann despoeu, in del 1941, dop de un intervent a l'intestin a l'età de 59 agn.

Oeuvre principai

Dubliners, 1914

Proeusa

• 1914: Dubliners
• 1916: A Portrait of the Artist as a Young Man
• 1922: Ulysses
• 1939: Finnegans Wake
• 1944: Stephen Hero

Poesia

• 1907: Chamber Music
• 1914: Giacomo Joyce
• 1927: Pomes Penyeach
• 1936: Collected Poems

Teater

• 1918: Exiles

Bibliografia

• Performer Heritage 2, Zanichelli