發燒
想搵張惠妹專輯嘅話，請睇發燒 (張惠妹專輯)。
發燒，一般睇成病徵，實情為免疫系統反應，升高體溫消滅病源體。有脊椎恆溫動物，都行依一套。
人體溫，約莫攝氏卅七度左右恆溫，然而人人有高有低，日夜都有分別，故此幾多度先叫得發燒，並無一致定論。有啲低至卅七度二，有啲高至卅八度三 。細蚊就會高一啲，皆因免疫系統發育緊，有助對抗病源體。故此又會相應調高一啲。
過往因為好多病死，而死時又往往有發燒。故此當發燒做病，發燒好驚，甚至有燒壞腦咁諗法。父母見年幼仔女發燒，尤其驚恐，醫者睇為恐懼症。實質係病原體傷人，而非發燒傷人。
發燒亦唔會燒壞腦，因為人腦會控制住體溫。要燒壞腦，要去到攝氏四十二度，體溫極難去到咁熱，除非外在因素，如困喺熱焗情況，如車箱密封兼曬到爂[1]。
只要免疫系統認有必要，就會發燒。常見病如傷風感冒咁，都有可能發燒。
退燒藥對病無幫助，反而阻住免疫系統做嘢。嚴重高燒或燒到唔舒服先用[1]。
黃帝內經叫發燒做熱。「人之傷於寒也、則為病熱、熱雖甚不死、其兩感於寒而病者、必不免於死[2]。」人發燒原因，皆因受寒而傷身，因而病到發燒，但發燒勁都唔會死。
機制
[編輯]體溫升，會啟動細胞機制，確保免疫系統，對細菌病毒等，做出合適行動[3]。
蛋白質NF-κB，協助控制基因表達，生産某啲免疫細胞。有細菌、病毒啲化學份子嗰陣，依隻蛋白質，就會喺細胞層次，開關免疫反應有關基因。隻嘢口喺體溫低唔多活躍，故此升到卅七度以上，等佢勁啲[3]。
實情再複雜啲。有隻蛋白質叫A20，生佢出來個基因又叫A20。隻蛋白質可謂發炎反應守門人，同NF-κB跳晒舞。NF-κB開着A20基因，生A20蛋白質。A20蛋白質，又控制返NF-κB，等佢做慢定勁[3]。
無A20蛋白，NF-κB就對熱無反應，就算發燒都唔會勁咗[3]。
故此天一涼就多傷風感冒。天口熱地方鼠類，少啲發炎少啲癌。顯示免疫反應隨溫度轉變[3]。